Itaia
22 E kangai te taeka ni kaineti ma te Mwarua ni Miitara:*+
Tera ae riki iroum ngkai ko bane ni waerake nakon taian taubuki?
2 Ko onrake n te kiriwe,
Te kaawa ngkoe ae ko karongoa, ao te kaawa ae ko kakatonga.
A aki kamateaki n te kabaang am koraki aika kamateaki,
Ao a aki naba mate n te buaka.+
3 A bane ni birinako am tia tautaeka aika iowawa.+
A kairakinako bwa taenikai n akea kainnanoan te kainikatebe.
A bane ni kairakinako bwa taenikai te koraki ake a kuneaki,+
E ngae naba ngke a birinako nako kiraroa.
4 Anne bukina ae I kangai iai: “Katannakoi matami mairou,
Ao N na tang ni korakai.+
5 Bwa bon te bong ni mangaongao, ni konaaki, ao ni buannano,+
Mairoun te Uea ae Moan te Rietata ae Iehova ae Atuaia taanga ni buaka,*
N te Mwarua ni Miitara.
E na iai uruakakin te oo,+
Ao te tang nakon te maunga.
7 E na onrake n taiani kaa ni buaka am mwarua*
Aika taiani kabanea n tamaroa,
Ao a na tei aoti* ni nneia ni mataroan te oo,
8 Ao e na kanakoaki nangoan* Iuta.
“N te bong anne ao ko na taraa nnen te bwai ni buaka are n te Auti ae Buakonikain Rebanon,+ 9 ao kam na nori bwangabwanga aika bati n Ana Kaawa Tawita.+ Ao kam na itiran man te nei are mai nano.+ 10 Kam na wareki autin Ierutarem, ao kam na katikii ni kabwakai auti bwa kam na kamatoaa te oo. 11 Ao kam na karaoa te beetin i marenan oo ake uoua ibukin ranin te nei are rimoa, ma kam na aki taraa te tia Karaoia are Moan te Kakannato, ao kam na aki nora Teuare karaoia ngkoangkoa.
12 N te bong anne ao te Uea ae Moan te Rietata ae Iehova ae Atuaia taanga ni buaka,
E na tua te tang ma te tanginiwenei+
Ao imanakin te atu ma bwainakin te raerobwa.*
13 Ma n oneani mwin anne ao e boo te bukamaru ao te kimwareirei,
Tiringaia kaao ma kamateaia tiibu,
Kanakin te irikomaiu ao nimakin te wain.+
‘Ti na amwarake ma ni moi, bwa ti na mate ningabong.’”+
14 Ao e kaota te baei i taningau Iehova ae Atuaia taanga ni buaka ni kangai: “‘E na aki kabwaraaki te bure aei ibukimi ni karokoa ae kam mate,’+ bon ana taeka te Uea ae Moan te Rietata ae Iehova ae Atuaia taanga ni buaka.”
15 E kangai ana taeka te Uea ae Moan te Rietata ae Iehova ae Atuaia taanga ni buaka: “Naako riin nakon te toro, nakon Tiebena+ are te mataniwi n te auti,* ao kangai, 16 ‘Tera ae ko tangiria ikai, ao antai ae ko tangiria ikai ngkai ko a ekea ruanimatem ikai?’ E ekea ruanimatena teuaei n te tabo ae rietata, e ekea nnena ni motirawa* n te bwaa. 17 ‘Noria! E na kakorakoraa Iehova n tewenakoko nako naano, ngkoe ae te aomata, ao e na tauko ma te matoa. 18 E na bon niriko ni kamatoako ao e na karabinoko n ai aron te booro nakon te aba ae raababa. Ko na mate ikanne ao a na mena ikanne am kaa ni buaka aika tamaroa, aika kamaamaean ana auti am toka. 19 Ao N na kabwakako mani nnem, ao N na tewenakoko man nakoam.
20 “‘N te bong anne ao N na wetea au toro ae Eriakim+ are natin Irekia, 21 ao N na kunnikainna n am kamwarai ao ni kabaea i aona kabaean nukam ni kakooa,+ ao N na anga mwaakam ni kairiri* nako nanoni baina. Ao e na riki bwa tamaia kaain Ierutarem ao tamaia tibun Iuta. 22 Ao N na katokaa i aon angana kiingin ana auti Tawita.+ E na kaukia ao akea temanna ae e na kainna, ao e na kainna ao akea temanna ae e na kaukia. 23 N na kanimwa teuaei n ai aron te neera n te tabo ae teimatoa, ao e na riki bwa ai aron te kaintokanuea ae tamaroa n ana auti tamana. 24 Ao a na katinei ni kabane i aon teuaei tamaroan* ana auti tamana, taiani kanoa ma kariki,* nneni bwaai aika uarereke ni kabane, boora n ikotaki ma kaatibu aika bubura ni kabane.
25 “‘N te bong anne,’ bon ana taeka Iehova ae Atuaia taanga ni buaka, ‘e na kanakoaki te neera are nim n te tabo ae teimatoa,+ ao e na koreaki ni kabwakaaki ao e na bwaka, ao e na uruaki te uota are e boutokaia, bwa e a tia Iehova n taekinna.’”