Itaia
21 E kangai te taeka n ekaanako rereuan taari:*+
E a roko n ai aron te angibuaka ae kare i maiaki,
Man te rereua, man te aba ae kakamaaku.+
2 I tuangaki te miitara ae kakamaaku, ae kangai:
E a kamwanea te aba te tia mwamwanaa te aba.
Ao e a kakamauna te tia kamauna te aba.
Waerake ngkoe ae Eram! Otabwaninia, ngkoe ae Miria!+
N na katoki ikenrawa ni kabane ake e karikii neiei.+
3 Anne bukina ae I a rangi ni korakai iai ni maraki.*+
E a taonainako te maraki
N aron aririn te aine ae nangi bung.
I a rangi n rawawata ao I a aki kona n ongo,
Ao I a rangi n aki rau ao I a aki kona n noraaba.
4 E tabeaianga nanou. I ruru n te maakunrang.
Ao I a ruru n te airoo are I kakariariaa.
5 Katauraoa te taibora ao bairei kaintekateka!
Amwarake ao moi!+
Teirake ngkami tooka, ao kabira te otanga!*
6 Bwa e kangai ana taeka Iehova nakoiu:
“Naako, katea te tia tantani ni nnena ao tuangnga bwa e na taekina te bwai ae e noria.”
7 Ao e nora te kaa ni buaka tewaana ae katikitikaki irouia aoti aika uoman,
Ao te kaa ni buaka tewaana ae katikitikaki irouia taongki,
Ao te kaa ni buaka tewaana ae katikitikaki irouia kamero.
E karaua raoi ni mataku ao e iaiangoia raoi.
8 Imwina ao e a takarua n ai aron te raian ni kangai:
“Iehova, I teimatoa n tei n te ngaina i aon te taua n tantani,
Ao I tei n au tabo n tantani ni katoa tairiki.+
9 Nora te bwai ae e a roko:
Mwaane aika toka i aon te kaa ni buaka tewaana ae katikitikaki irouia aoti aika uoman!”+
Ao e taetae teuaei ni kangai:
“E a bwaka neiei! E a bwaka Baburon!+
E a tia teuaei ni kamaeinikuni i aontano atuan neiei aika bouannanti aika kaaraki!”+
10 Ngkami aika au aomata ake a a tia ni kaakaki kunimi n ai aron te uita,
Aika uaan* au tabo ni kaaki kun ni uita,+
I a tia n tuangingkami te bwai are I ongo mairoun Iehova ae Atuaia taanga ni buaka,* ae Atuan Iteraera.
11 Te taeka n ekaanako Ruma:*
E takarua nakoiu temanna mai Teira+ ni kangai:
“Te tia tantani, tera taekan te tairiki?
Te tia tantani, tera taekan te tairiki?”
12 E taku te tia tantani:
“E a roko te moaningabong, ao te tairiki naba.
Ngkana ko kan titiraki ao titiraki.
Kam a manga oki!”
13 E kangai te taeka n ekaanako te rereua ae aoraoi:
Ao ngkami aika taani mwamwananga mai Tetan,*+
Kam na tiku n te tairiki n te buakonikai n te rereua ae aoraoi.
14 Uota te ran ni butimwaea iai ane e bora n taka,
Ngkami aika kaain te aba ae Teema,+
Ao uota te kariki ibukin ane e birinako.
15 Bwa a birinako man taiani kabaang, man te kabaang ae buutaki mani kauna,
Man te kainikatebe ae kabwaouaaki, ao man te boo ni buaka ae korakora.
16 Bwa e kangai ana taeka Iehova nakoiu: “I nanon teuana te ririki, ae ai aron ana ririki te tia mwakuri ae kabooaki ana mwakuri,* ao e na roko n tokina tamaroani Keta+ ni kabane. 17 E na karako nikiraia taani katebe aika taani buaka mai Keta, bwa e a tia n taekinna Iehova ae Atuan Iteraera.”