Taani Motikitaeka

1 Imwini maten Iotua+ ao a titirakina Iehova tibun Iteraera+ ni kangai: “Antai mai buakora ae e na waerake moa ni buakania tibuni Kanaan?” 2 E kaeka Iehova ni kangai: “A na waerake tibun Iuta.+ Noria! I a anga* te aba nako nanoni baia.” 3 A taku ngkanne tibun Iuta nakoia tariia ake tibun Timeon: “Waerake ma ngaira nakon ara aono*+ ae ti anganaki, bwa ti na buakania tibuni Kanaan. Ao ti na manga iriingkami nakon ami aono ane kam anganaki.” Mangaia are a airi ma ngaiia tibun Timeon.

4 Ngke a waerake tibun Iuta, ao Iehova e anga tibuni Kanaan ma taiani Beritaite nako nanoni baia,+ ao a tokanikai i aoia mwaane aika 10,000 i Beteka. 5 A kunea Atonibeteka i Beteka, ao a buakanna ikanne ma n tokanikai i aoia tibuni Kanaan+ ma taiani Beritaite.+ 6 Ngke e birinako Atonibeteka, ao a kakioa ao e reke irouia, ao a kabwabui waebuani baina ma waebuani waena. 7 Ao e taku Atonibeteka: “Iai ueea aika 70 ake a kabwabuaki waebuani baia ma waebuani waeia, ake a rikorikoi amwarake i aan au taibora. Te bwai ae I a tia ni karaoia ao e a manga karaoia nakoiu te Atua.” Imwin anne ao a kairia nako Ierutarem+ ao e mate ikekei.

8 Irarikin anne, a buakana Ierutarem mwaane aika tibun Iuta,+ ao a taua. A oreiia kaaina n te kabaang ma ni kabueka te kaawa n te ai. 9 Imwin anne ao a ruo mwaane aika tibun Iuta ni buakania tibuni Kanaan ake a maeka n te aono ae maungaunga ao n te Nekebo,* ao n te Tiebira.*+ 10 Mangaia are a mwananga tibun Iuta n ekiianako tibuni Kanaan ake a maeka i Eberon (Aran Eberon mai mwaina boni Kiriataareba), ao a oreiia tibun Tetiai, Aiman, ao Taremai.+

11 A mwananga mai ikekei n ekiianako kaain Tebira.+ (Aran Tebira mai mwaina boni Kiriatatebera.)+ 12 E taku ngkanne Kareba:+ “Te mwaane ae orea Kiriatatebera ao e taua, ao N na anganna natiu te aine ae Aketa bwa buuna.”+ 13 Ao e taua te kaawa anne Oteniera+ are natini Kenati+ are tarini Kareba ae uarereke riki. Mangaia are e a anganna natina te aine are Aketa bwa buuna. 14 Ngke e a nakoni mwengana Aketa, ao e a kaumaka Oteniera bwa e na butiia taman neiei te tawaana. Ao e ruo Aketa man ana taongki* ao e a titirakinna naba Kareba ni kangai: “Tera ae ko tangiria?” 15 E taku Aketa nakon teuaei: “Taiaoka anganai te kakabwaia, bwa ko a tia n anganai te mwakoro n aba i maiaki,* ma anganai naba Kurotamaim.”* Ao Kareba e angan neiei Kurota are mai Eta ao Kurota are mai Nano.

16 Ao kanoan te Kenaite,+ are tamani buuni Mote,+ a waerake ma tibun Iuta man te kaawa ae a mena iai aroka aika baam,+ nakon rereuan Iuta are i maiakin Aratia.+ A nako ikekei ao a maeka i buakoia aomata.+ 17 Ma a mwananga tibun Iuta ma tariia ake tibun Timeon, ao a buakania tibuni Kanaan ake a maeka i Tebata, ao a kamauna.+ Mangaia are a arana te kaawa anne bwa Orema.*+ 18 Ao tibun Iuta a taua Kaata+ ma aonona, Atikeron+ ma aonona, ao Ekiron+ ma aonona. 19 E memena Iehova irouia tibun Iuta, ao a taua te aono are maungaunga, ma a aki kona ni kakioianako kaain te tabo ae aoraoi,* ibukina bwa iai aia kaa ni buaka aika otinako kabaang mani wiraia.*+ 20 A anga Eberon nakoni Kareba, n aron are e beritanna Mote,+ ao e kakioianako mai iai natin Anaka mwaane ake teniman.+

21 Ma tibuni Beniamin a aki kakioianako I-Iebuti ake a maeka i Ierutarem, mangaia are a teimatoa ni maeka I-Iebuti ma tibuni Beniamin i Ierutarem ni karokoa te bong aei.+

22 A waerake n te tai anne tibun Ioteba+ n ekaanako Betaera, ao e memena Iehova irouia.+ 23 A karaba n tuoa aoni Betaera tibun Ioteba (aran te kaawa anne mai mwaina bon Ruti),+ 24 ao a nora te mwaane temanna ae otinako man te kaawa taani karaba n tutuo. Mangaia are a taku nakoina: “Taiaoka kaota nakoira te kawai n rin n te kaawa, ao ti na kaota te akoi nakoim.”* 25 Mangaia are e kaota te kawai n rin n te kaawa te mwaane arei nakoia, ao a orea te kaawa n te kabaang, ma a kainaomataa te mwaane arei ma ana utu ni kabane.+ 26 E nako abaia tibun Eta te mwaane arei, ao e katea te kaawa ao e aranna bwa Ruti, ae arana ni karokoa te bong aei.

27 Ao a aki tokanikai tibuni Manate i aoni Betatean ma kaawa ake a mena i aana,* Taanaka+ ma kaawa ake a mena i aana, ao a aki tokanikai naba i aoia kaain Toora ma kaawa ake a mena i aana, kaain Ibeream ma kaawa ake a mena i aana, ao kaaini Mekito ma kaawa ake a mena i aana.+ A imanono tibuni Kanaan n tiku ni maeka n te aba aei. 28 Ngke a a rikirake ni korakora tibun Iteraera, ao a tautoronia tibuni Kanaan,+ ma a aki kababaneia ni kakioianako.+

29 Ao tibun Eberaim a aki naba kakioianako tibuni Kanaan ake a maeka i Ketera. A teimatoa tibuni Kanaan ni maeka i buakoia i Ketera.+

30 Ao tibun Teburun a aki kakioianako kaaini Kiteroon ma kaain Naarora.+ A teimatoa tibuni Kanaan ni maeka i buakoia ao n tautoronaki.+

31 Ao tibun Atera a aki kakioianako kaain Ako, kaain Titon,+ Araba, Aketiba,+ Ereeba, Abiki,+ ao Reoba.+ 32 Mangaia are a teimatoa tibun Atera ni maeka i buakoia tibuni Kanaan ake a maeka n te aba, ibukina bwa a aki kakioianako.

33 Ao tibun Nabetari a aki kakioianako kaaini Betatemeti, ao kaaini Betaanata,+ ma a teimatoa ni maeka i buakoia tibuni Kanaan ake a maeka n te aba.+ Ao a riki kaaini Betatemeti ma kaaini Betaanata bwa aia toro aika a tautoronia.

34 Ao taian Amoraite a kainia tibun Tan n te aono ae maungaunga, bwa a aki kariaia taian Amoraite bwa a na ruo tibun Tan nakon te tabo ae aoraoi.*+ 35 Mangaia are a imanono taian Amoraite n tiku ni maeka n te Maunga ae Eereti, Aiiaron,+ ao Tiaarebim.+ Ma a riki bwa tooro aika tautoronaki ngke e a rikirake* korakoraia* tibun Ioteba. 36 E moa aia aono taian Amoraite man te kawai n ararakea Akerabim,+ ao mai Teeira ni waerake.