2 I-Korinto
2 Bwa I a tia ni baireia bwa ngkana I a manga kawaringkami ao I aki tangiria bwa e na iai te nanokawaki. 2 Bwa ngkana I kananokawakingkami, ao antai ikanne ae e na kabebeteai, tiaki bon are e nanokawaki irou? 3 I korea te baere I karaoia, n te aro are ngkana I roko ao N na aki kona n nanokawaki irouia te koraki ake I bon riai ni kimwareirei irouia, ibukina bwa I aki nanokokoraki bwa te baere I kimwareirei iai kam bane naba ni kimwareirei iai. 4 Bwa I koroboki nakoimi ma rannimatau ae bati, ngkai I rangi n rawawata ao e korakai nanou, tiaki ibukini kananokawakami,+ ma kam aonga n ataia bwa I rangi n tangiringkami.
5 Ma ngkana iai ae e kauekea te nanokawaki,+ ao e aki kananokawakai ma e kananokawakingkami ni kabane—ma I aki kan atongi taeka aika rangi ni matoatoa. 6 E a tau boaakin te aomata anne, ngkai e boaaki irouia angia kaain te ekaretia, 7 ma n oneani mwin anne, kam riai n akoia ni kabwaraa ana bure ngkai ao kabebetea,+ bwa e aonga n aki taonakinako* teuaei n nanokawakina.+ 8 I kaungaingkami bwa kam na kaota koauan ami tangira ibukina.+ 9 Bwa I kororeta naba ibukin aei: bwa N na ataia bwa kam kaota koauan aromi, bwa tao kam ongeaba ni bwaai ni kabane ke kam aki. 10 Ngkana kam kabwaraa ana bure temanna ibukin te bwai teuana, ao I kabwaraa naba ngai. Ni koauana, ane I a tia ni kabwaraa, (ngkana arona bwa I a tia ni kabwarai buure), ao I kabwarai ibukimi, ao Kristo bon te tia kakoaua iai, 11 bwa ti aonga n aki konaaki* iroun Tatan,+ ngkai ti aki babanga n ana kunemwaan.*+
12 Ao ngke I roko i Teroa+ bwa N na tataekina te rongorongo ae raoiroi ae taekan te Kristo, ao e a kaukaki nakoiu te mataroa teuana ni kaineti ma ana mwakuri te Uea. 13 Ma I aki rau ngke e aki reke irou Tito+ are tarira, mangaia are I a kaboo ma taari ao I a nako Maketonia.+
14 Ma e na katituaraoaki te Atua, ae e aki toki ni kairirira n te mwaati n tokanikai ma te Kristo, ao e kabonganaira ni kakiakiaanako boin ataakina n taabo nako! 15 Bwa boni boiararani Kristo ngaira iroun te Atua, i buakoia ake a a tabe ni kamaiuaki ao i buakoia ake a a tabe ni mauna, 16 ae te boi* ae kairiri nakon te mate nakoia ake a a tabe ni mauna,+ ao te boi ae kairiri nakon te maiu nakoia ake a a tabe ni kamaiuaki. Ao antai ae tau ibukini baikai? 17 Boni ngaira, bwa tiaki taani bitineti ngaira* n ana taeka te Atua+ n aroia aomata aika bati, ma ti taetae ma nanora ni koaua n aroia aomata aika kanakoaki iroun te Atua, eng, i matan te Atua ngkai taan rimwini Kristo ngaira.