Abakuka
2 N na teimatoa n tei n au tabo n tantani,+
Ao N na tei i aon taian nono.
N na teimatoa n tantani bwa N na nora te bwai are e tangiria bwa N na taekinna,
Ao te bwai ae N na taekinna ngkana I boaaki.
2 Ao e kaekaai Iehova ni kangai:
“Korea te miitara aei ao kaaria ni kamataataa raoi i aoni baaba,+
Bwa e aonga ni bebete warekana* iroun te aomata ngkana e wareware ni kabaibati mai iai.+
3 Bwa e na koro bukin te miitara aei n taina ae baireaki,
Ao e na waekoa n roko n tokina te tai anne,* ao e na bon aki kewe.
E ngae ngkana e baenikai,* ma teimatoa ni kantaningaia!*+
Bwa e na boni koro bukina
Ao e na aki waeremwe!
4 Nora te aomata ae kainikatonga,
E bon aki eti nanona,
5 Ibukina bwa e boni mwamwanaa te aba te wain,
E na aki roko n tiana te aomata ae kainikatonga.
E kabuburaa nanona ni bwarui bwaai n ai aron te Ruanimate.*
Titeboo teuaei ma te mate ae aki kona n rauaki.
E teimatoa n ikotiia natannaomata ni kabane
Ao n rikorikoia botannaomata ni kabane i bon ibukina.+
6 Tiaki a na bane naakai n taekina te kario, te taeka ae raba nanona, ao te kamwaninga n ekaanako teuaei?+
Ane a na kangai:
‘Ke e reke kain teuare kaikoi bwaai aika tiaki ana bwai,
Ao teuare boni karakaa oin ana taarau!
E na maanra te aro aei?
7 Tiaki a na rina n teirake naake ko taarau irouia?
A na uti ao a na ioioiko n te aro n iowawa,
Ao a na boni kuribwaiko.+
8 Ibukina bwa ko kuribwaiia natannaomata aika bati,
Ao a na kuribwaiko naba nikiraia botannaomata ni kabane,+
Ibukina bwa ko katutui raraaia aomata,
Ao ko iowawa nakon te aonnaba,
Nakon taiani kaawa ao naake a maeka iai.+
9 Ke e reke kain ane e karekea ana raka n te babakanikawai ibukin ana utu,*
Bwa e aonga ni katea ngaona n te tabo ae rietata,
Bwa e na birinako mai nanoni bain te karawawata!
10 Ko a tia ni bairea te kamaamaeaki nakon am utu.*
Ko bure nakoim n arom ni kamaunaia botannaomata aika bati.+
11 Bwa e na tang te atibu man te oo,
Ao te oka e na kaekaa man te taubuki.
12 Ke e reke kain ane e katea te kaawa n te katuturaraa,
Ao ane e kamatoaa te kaawa n te buakaka!
13 Noria! Tiaki bon Iehova ae Atuaia taanga ni buaka* ae e kairiia botannaomata bwa a na mwakuri korakora ni karekarea kanaan te ai,
Ao natannaomata bwa a na kakuaia i bon irouia ibukin te akea?+
14 Bwa e na buta te aonnaba n ataakini mimitongin Iehova,
N aron taari ngkai e kabutaa marawa.+
15 Ke e reke kain ane e angania raona nimaia,
Ao e renganna n te un ae korakora ma te bononnano, bwa e na kakoroia ni manging iai,
Bwa e aonga n nora bwain rabwataia aika riai ni karabaaki!
16 E na riao tibutauam n te kamaamaeaki ao tiaki n te karineaki.
Ngkoe naba moi ao kaota aki korotobibiam.*
Ao e na roko iroum te mwangko are i bain Iehova are te atai,+
Ao e na rabunaanako karineam te bwaibwainrang.
17 Bwa e na rabuniko te iowawa are karaoaki nakon Rebanon,
Ao e na roko i aom te urubwai are kakamaakuia maan,
Ibukina bwa ko katutui raraaia aomata,
Ao ko iowawa nakon te aonnaba,
Nakon taiani kaawa ao naake a maeka iai.+
18 Tera manenan te bouannanti ae kaaraki
Ngkana e tia ni karaoia te tia kaaria?
Tera manenan te bouannanti ae te biti* ao te tia reirei ni baika kewe?
E na kangaa te tia karaoi atua aika akea manenaia aikai n onimakini?
Bwa a aki kona n taetae!+
19 Ke e reke kain ane e kangai nakon te mwakoro ni kai, “Uti!”
Ke nakon te atibu ae aki kona n taetae, “Teirake! Reireinira!”
Noria! E kanimwaki te koora ma te tirewa n rabunaki iai,+
Ao bon akea naba teutana te ikeike i nanona.+
20 Ma e mena Iehova n ana tembora ae tabu.+
Kainabwabu i matana ngkami aika kaain te aonnaba ni kabutaa!’”+