Ieremia
47 Aio ana taeka Iehova nakon Ieremia are te burabeti ni kaineti ma I-Biritia+ imwain ae e oreaki Kaata ni kabwakaaki irouni Barao. 2 E kangai ana taeka Iehova:
“Noria! A a roko raan mai meang.
A na riki bwa te karaanga ae korakora raangana.
Ao a na iekaanako te aba ma bwaai nako ake iai,
Ao te kaawa ma kaaina.
A na takarua n tang aomata,
Ao a na tanginiwenei aomata nako aika maeka n te aba.
3 A na aki naba rairaki taama ni buokiia natiia mwaane,
Ni karongoaani bukibukini waeia ana aoti aika mwaane,
Ni kekeruaatain ana kaa ni buaka,
Ao n rurungaani wiran ana kaa,
Bwa a a mamaara baia,
4 Ibukina bwa e na kamaunaia I-Biritia+ ni kabane te bong ae e a roko.
E na koreianako mai Turo+ ao Titon+ nikiraia nako taan ibuobuoki.
5 E na roko te mara* i Kaata.
E a kainabwabuaki Atikeron.+
6 Ngkoe ae ana kabaang Iehova!+
Ko na maanra n tiku n aki rau?
Okira kaum.
Rawea motirawam ao kainabwabu.
7 E na kangaa n tiku n rau
Ngkana e a tia n tua Iehova nakoina?
E na ekaanako Atikeron ma te aono are i mataniwin te aba,+
Bwa ikanne are e mwiokoia nako iai.”