Ieremia
39 N ana karuaiwa n ririki n tautaeka Tetekia are Uean Iuta, n te katebwina n namwakaina, ao e a roko i Ierutarem Nebukaneta* are Ueani Baburon ma ana taanga ni buaka ni kabane, ao a otabwaninia.+
2 N ana ka-11 n ririki n tautaeka Tetekia, n te kaaua n namwakaina ae ruaiwa iai bongin te namwakaina, ao a urua oon te kaawa.+ 3 Ao a bane n rin ana aomata ueani Baburon aika tooka ao a tekateka n te Mataroa are i Nuka,+ aika Nerekaratiaretera ae te Tamkara, Nebotaretekim ae te Rabatarita,* Nerekaratiaretera ae te Rabamaka,* ao nikiraia ni kabane ana aomata ueani Baburon aika tooka.
4 Ngke a noriia naakai Tetekia are Uean Iuta ma tautia ni kabane, ao a birinako+ n otinako man te kaawa n te tairiki ni kawain ana onnaroka te uea, n rinanoni mataroan te oo are i marenan oo ake uoua, ao a touaanako kawaia ni kawain te Arabaa.*+ 5 Ma a kakioia naakai aia taanga ni buaka I-Kareria, ao a ooa Tetekia n rereuan Ieriko ake a aoraoi.+ A taua ao a kairia ni waerake nakon Nebukaneta* are Ueani Baburon i Ribera,+ n te aba ae Amata,+ ike e a bairea iai taekan teuaei. 6 Ao ueani Baburon e kamateia natin Tetekia bon i matan teuaei i Ribera, ao e kamateia naba bwaanuean Iuta ni kabane ueani Baburon.+ 7 Ao e kamataki matan Tetekia, ao imwina e kabaea ni bwaai ni kabaewae aika taiani buraati bwa e na kairaki nako Baburon.+
8 Ao I-Kareria a kabueka ana auti* te uea ma aia auti aomata,+ ao a urui ni kabwakai oon Ierutarem.+ 9 Ao Nebutaratan+ are mataniwia taan tantani, e kairiia bwa taenikai nikiraia aomata ake a tiku n te kaawa nako Baburon, naake a birinako ma ni mena n ana itera, ao aomata ake a tiku.
10 Ma Nebutaratan are mataniwia taan tantani e katikuia n te aba ae Iuta tabeman aomata aika taiani kabanea ni maiu ni kainnano, ake te koraki ake bon akea naba teuana aia bwai. N te bong anne ao e angania naba taiani nne ni kureebe ao tawaana bwa a na mwakuri iai.*+
11 Ao e tua ae kangai Nebukaneta* are Ueani Baburon nakon Nebutaratan are mataniwia taan tantani, ni kaineti ma Ieremia: 12 “Kairia ao tararuaia, tai karaoa ae iowawa nakoina, ao anganna te bwai ane e butiiko.”+
13 Mangaia are a kanaanako Nebutaratan are mataniwia taan tantani, Nebutiatiban are te Rabatarita,* Nerekaratiaretera are te Rabamaka,* ao ana rorobuaka ni kabane aika kakannato ueani Baburon, 14 bwa e na anaaki Ieremia man Aia Katawanang Taan Tantani,+ ao n anganaki Ketaria+ are natin Aikam+ are natin Tiaban+ bwa e na kairaki nakon ana auti. Mangaia are e maeka i buakoia aomata.
15 Ngke e kainaki Ieremia n Aia Katawanang Taan Tantani,+ ao e roko ana taeka Iehova iroun teuaei ae kangai: 16 “Naako tuanga Ebetamereka+ are te I-Itiobia ni kangai, ‘E kangai ana taeka Iehova ae Atuaia taanga ni buaka* ae Atuan Iteraera: “Noria ae I a kakoroi bukin au taeka i aon te kaawa aei ibukin te kabuanibwai ao tiaki ibukin te bwai ae raoiroi, ao n te bong anne ao ko na noria bwa e a riki.”’
17 “‘Ma N na kamaiuko n te bong anne,’ bon ana taeka Iehova, ‘ao e na aki anga te aba ngkoe nakoia mwaane ake ko maakuia.’
18 “‘Bwa N na boni karekea angam ni birinako, ao ko na aki bwaka n te kabaang. E na reke maium* bwa konam,*+ ibukina bwa ko onimakinai,’+ bon ana taeka Iehova.”