Itaia

37 Ngke e ongo naba ngkekei te baei te Uea are Etekia, ao e raeuai kunnikaina ao e rabunna n te raerobwa,* ao e rinnako n ana auti Iehova.+ 2 Ao e kanakoa Eriakim are te mataniwi i aoia kaaini batan* te uea, ao Tiebena are te tia koroboki, ao aia unimwaane ibonga,* aika rabunia n te raerobwa, nakon Itaia are te burabeti+ are natin Amoti. 3 Ao a taku nakoina: “E kangai ana taeka Etekia: ‘Bon te bongi n rawawata te bong aei, te bong ni boaaki,* ao te bong ni bwainrang, bwa a a tauraoi ataei ni bungiaki,* ma ai akea te korakora ni bung.+ 4 Tao ane e na ongo Iehova ae Atuam ana taeka te Rabetiake, are e kanakoaki iroun uean Aturia are ana toka bwa e na kakanikoa te Atua ae maiu,+ ao ane e na kaeta taekana Iehova ae Atuam ibukin taeka ake e ongo. Mangaia ae ko na tabeka am tataro+ ibukia te nikira ake a tiku ni maiu.’”+

5 Mangaia are a a rinnako ana toro te Uea are Etekia nakon Itaia,+ 6 ao e taku Itaia nakoia: “Kam riai ni kangai nakon ami toka, ‘E kangai ana taeka Iehova: “Tai maaku+ ibukin taeka ake ko ongo, ake a taekin ana toro uean Aturia+ ni kamatauningaai iai. 7 N na karina ngkai te iango teuana n ana iango, ao ane e na ongo te rongorongo teuana ao e na okira oin abana,+ ao N na kabwakaa n te kabaang n oin abana.”’”+

8 Ngke e ongo te Rabetiake bwa e a tia uean Aturia ni kitana Rakiti, ao e a oki nakoina ao e a kunea ngke e buakana Ribena.+ 9 E a ongo ngkai te uea taekan Tireaka are Uean Itiobia, ae kangai: “E a otinako bwa e na buakaniko.” Ngke e ongo aei, ao e a manga kanakoia taan uataeka nakon Etekia+ ao e kangai: 10 “Aio te bwai ae kam riai n taekinna nakon Etekia are Uean Iuta, ‘Tai kariaia Atuam ae ko onimakinna bwa e na mwamwanaiko ngkai e kangai: “E na aki kanakoaki Ierutarem nako nanoni bain uean Aturia.”+ 11 Noria! Ko a tia n ongo baike a karaoi uean Aturia nakon aaba ni kabane, n aroia ni kamaunai.+ N am iango tii ngkoe ae ko na kamaiuaki? 12 Te koaua bwa a kamaiuaki irouia atuaia natannaomata ake a kamaunaaki irouia au bakatibu?+ E nga Kotan, Aran,+ Retieba, ao kaain Eten ake i Terata? 13 E nga uean Amata, uean Arebata, ao uean te kaawa ae Tebarewaim,+ ao uean Ena, ao uean Iwa?’”

14 E a anai ngkanne reeta Etekia mai nanoni baia taan uataeka ao e wareki. Imwina ao e a waerake Etekia nakon ana auti Iehova, ao e taakini baikai* i matan Iehova.+ 15 Ao e a tataro Etekia nakon Iehova+ ao e kangai: 16 “Iehova ae Atuaia taanga ni buaka*+ ae Atuan Iteraera, ae ko tekateka n te kaintokanuea i etaia* kerubim,* bon tii ngkoe te Atua ae koaua ae tautaeka i aoia tautaeka n uea ni kabane aika n te aonnaba. Ko karaoa karawa ma te aonnaba. 17 Katanimaia taningam ngkoe ae Iehova ao ongora!+ Kaurei matam ngkoe ae Iehova ao noria!+ Ongora n taeka ni kabane ake e kanakoi Tennakeriba ni kakanikoa iai te Atua ae maiu.+ 18 Bon te koaua Iehova, ae a a tia uean Aturia ni kamaunai aaba ni kabane,+ n ikotaki naba ma oin abaia. 19 Ao a karenakoi atuaia nakon te ai,+ ibukina bwa bon tiaki atua ma bon aia mwakuri baia aomata,+ ae te kai ma te atibu. Anne bukina ae a kona n urui iai. 20 Ma ko bia kamaiuira ngkai Iehova ae Atuara mai nanoni baina, bwa e aonga n ataaki irouia tautaeka n uea ni kabane aika n te aonnaba ae bon tii ngkoe te Atua, ngkoe ae Iehova.”+

21 Ao e kanakoa te rongorongo aei Itaia are natin Amoti nakon Etekia ni kangai: “E kangai ana taeka Iehova ae Atuan Iteraera, ‘Ibukina bwa ko tataro nakoiu ni kaineti ma te Uea ae Tennakeriba are uean Aturia,+ 22 ao aio ana taeka Iehova are taekinna n ekaanako teuanne:

“E ribaiko natin Tion te aine ae tuai ni boo ma te mwaane ao e kakanikoko.

E ioioa atuna nakoim natin Ierutarem te aine.

23 Antai ae ko kakanikoa+ ao n taetae ni kamatauningaa?

Ao antai ae ko takarua+

Ao n euti matam akana kainikatonga akanne nakoina?

Bon nakon Teuare Tabu iroun Iteraera!+

24 Ko a tia ni kakanikoa Iehova rinanoia am toro+ ao ko kangai,

‘N au kaa ni buaka aika mwaitikurikuri

Ao N na ararakei maunga aika rietata,+

Ake mwakoron Rebanon ake taiani kabanea n raroanako.

N na korei ni kabwakai tiira aika rietata ake iai, ao kaai aika mwaiango aika rangi n raoiroi.

N na rin n taabo ni motirawa ake iai ake taiani kabanea n rietata, ake buakonikaina aika tamaroa.

25 N na keni mwanibwa ao ni moi n raan,

N na kabwatakatakai karaangan* Aikubita n nanoni waeu.’

26 Ko tuai n ongo? E a kamani motikaki* mangkoangkoa.

I a kamani katauraoia* mani boong ake a a tia n nako.+

N nang karokoa ngkai.+

Ane ko na onei kaawa aika nonoaki nakon taabo aika kamaroaa aika urubekebeke.+

27 Ane a na akea korakoraia kaaia.

A na maakunrang ao ni kamaamaeaki.

A na riki bwa kaanga aroka n te tawaana ao uteute aika kiriin,

Kaanga uteute n taian taubuki aika bue n te angimainiku.

28 Ma I ataa raoi te tai ae ko tekateka iai, te tai ae ko otinako iai, te tai ae ko rin iai,+

Ao te tai ae korakora iai unim irou,+

29 Ibukina bwa e a roko i taningau+ unim+ ae korakora irou ao bekoraram.

Mangaia ae N na kaaki au matau i bwairim ao au bwe+ i marenani wim,

Ao N na kairiko ni kaokiko n te kawai are ko roko mai iai.”

30 “‘Ao aei te kanikina ibukim:* Ane kam na amwarake n te ririki aei n ane e rikirake i bon irouna,* ao n te kauoua n ririki kam na kana te uita* ane rikirake mai iai, ma n te katenua n ririki ao kam na uniki koraa ma n tai, ao kam na ununiki n ami nne ni kureebe ma ni kang uaaia.+ 31 A na karibui wakaaia rikaaki ao ni karikii uaa ni waerake te koraki ake tibun Iuta ake a reke birinakoia, ake te koraki ake a a tiku bwa nikira.+ 32 Bwa e na otinako te nikira mai Ierutarem ao naake a reke maiuia man te Maunga ae Tion.+ E na karaoa aei ingaingan nanon Iehova ae Atuaia taanga ni buaka.+

33 “‘Mangaia ae e kangai ana taeka Iehova ni kaineti ma uean Aturia:+

“E na aki rin n te kaawa aei+

Ke ni katebea kanoan te kainikatebe nako iai

Ke ni kaitaraa ma te otanga

Ke ni katea te nono ni buaka n ekianako.”’+

34 ‘E na oki n te kawai are e roko mai iai.

E na aki rin n te kaawa aei,’ bon ana taeka Iehova.

35 ‘N na kamanoa te kaawa aei+ ao ni kamaiua i bon ibukiu,+

Ao ibukin au toro are Tawita.’”+

36 Ao e otinako ana anera Iehova ni kamateia mwaane aika 185,000 n aia kaembwa I-Aturia. Ngke a a utimwaaka aomata n te moaningabong, ao a a noriia maate ni kabane.+ 37 Mangaia are e a nako Tennakeriba are Uean Aturia ao e a okira Ninewe+ ma n tiku ikekei.+ 38 Ao ngke e bobaraaki teuaei n ana auti* Nitiroka are atuana, ao a a kamatea naba n te kabaang+ oin natina ake Aterammereka ma Tiaretera, ao a birinako nakon te aba ae Ararata.+ Ao e a riki natina are Etaraaton+ bwa te uea n onea mwina.