Te Minita
7 E raoiroi riki te ara ae raoiroi* nakon te kabira ae raoiroi,+ ao e raoiroi riki te bong ni mate nakon te bong ni bungiaki. 2 E raoiroi riki kawaran te auti ae boo iai te tanginiwenei nakon te auti ae boo iai te baka n amwarake,+ bwa bon anne tokia aomata nako, ao a riai n ururinga aei akana maiu. 3 E raoiroi riki te rawawata nakon te ngarengare,+ bwa e karaoiroa te nano te mata n nanokawaki.+ 4 E mena nanoia akana wanawana n te auti ae boo iai te tanginiwenei, ma e mena nanoia akana nanobaba n te auti ae boo iai te kimwareirei.*+
5 E raoiroi riki te ongora ni boaan te aba iroun te aomata ae wanawana,+ nakon te ongora n aia anene akana nanobaba. 6 Bwa n aron rebwetatan aroka aika kateketeke aika kabuekaki i aan te bwaata, ao ai aron naba ngarengareia akana nanobaba,+ ao bon akea naba manenan te baei. 7 Ma e kona te karawawata ni karokoa rangirangin te aomata ae wanawana, ao e kabuakakaa te nano te bwai ni kamaraato.+
8 E raoiroi riki tokin te bwai teuana nakoni moanakina. E raoiroi riki te taotaonakinnano nakon te kainikatonga.+ 9 Tai waekoa n un,+ bwa e memena te un i bwanibwania akana nanobaba.*+
10 Tai kangai, “E aera ngkai a raraoi riki boong ake rimoa nakon aikai?” bwa ko aki wanawana ngkai ko titiraki n aei.+
11 Te wanawana n ikotaki ma te tibwanga ae reke bon te bwai ae raoiroi, ao bon nakoraoin aroia te koraki ake a nora ootan te ngaina.* 12 Bwa bon te bwai ni kamanomano te wanawana,+ n aron te mwane ngkai te bwai ni kamanomano,+ ma aio raoiroin riki te atatai: Te wanawana e kateimatoa maiun te aomata are ana bwai te wanawana.+
13 Iangoa ana mwakuri te Atua ae koaua, bwa antai ae kona ni kaeta te bwai ae e a tia ni kabwaoua?+ 14 Iaiangoa te raoiroi aei n te bong ae raoiroi,+ ao n te bong ae karawawata* ko riai n ataia ae e kariaia te Atua boong aika raraoi ao aika karawawata,+ bwa a aonga aomata n aki ataa* te bwai ae e na riki nakoia n te tai ae e na roko.+
15 I nanoni maiuu ae akea manenana,+ ao I a tia n nori bwaai nako, ni moa mairoun te aomata ae raoiroi ae mate i buakon raoiroina,+ ni karokoa te aomata ae buakaka ae abwabwaki maiuna n aki ongea buakakana.+
16 Tai kabatiaa raoiroim n te aro ae riao+ ao tai kaotiko naba bwa e riao wanawanam.+ E aera ngkai ko na kamaunako i bon iroum?+ 17 Tai anga ngkoe nakoni karaoan te buakaka ke n riki bwa te nanobaba.+ E aera ngkai ko riai ni mate imwain am tai?+ 18 E raoiroi riki tauan te kauring ae teuana aei ao aki kaakan naba are teuana,+ bwa ane e maaka te Atua ao e na mutiakin ni kauoua.
19 Te wanawana e kakorakoraa riki te aomata ae wanawana nakoia mwaanen te kaawa aika korakora aika tengaun.+ 20 Bwa akea te aomata ae raoiroi n te aonnaba ae kakaraoa ae raoiroi n taai nako ao e aki bubure.+
21 Tai rangi ni mutiakin naba taeka nako ake a taekin aomata,+ bwa ko aonga n aki ongo ana taeka am toro n taekini baika bubuaka* ibukim, 22 bwa ko ataia raoi i nanom bwa a bati naba taai aika ko a tia iai ngkoe n taekini baika bubuaka ibukia tabemwaang.+
23 I katai baikai ni kabane n te wanawana ao I taku: “N na wanawana.” Ma e raroa mairou. 24 E kangaanga reken te bwai ae e a tia n riki, ao moan te nano. Antai ae kona n ota iai?+ 25 I kaira nanou bwa e na ataa te wanawana, e na ukeria, ao e na kakaaea, ma bukin rikini bwaai, ao e na ota bwa te nanobaba bon te buakaka ao te rangirang bon te nanobaba.+ 26 Ao I a kunea aei: E kammaraki riki nakon te mate te aine ae ai aron ana karaun te tia kamwane, ao nanona ai aron taiani karaun, ao baina ai aron taurekereke n te karabuuti. Ane e kakukureia te Atua ae koaua ao e na reke birinakona mairoun neiei,+ ma e raweaki te tia bure iroun neiei.+
27 E taku te tia ikotiia aomata,+ “Noria, aio te bwai ae I kunea, I karaoa au kakaae i aon te bwai teuana ma teuana, bwa e aonga n reke au kukune iai, 28 ma te baere I* teimatoa n ukoukoria e aki reke irou. I kunea te mwaane ae tii temanna ae raoiroi i buakoia aika tenga, ma akea te aine temanna ae raoiroi i buakoia. 29 Bon tii aei te bwai ae I kunea: E karaoiia aomata te Atua ae koaua bwa a na raoiroi,+ ma a a manga ukoukori babaire aika bati riki.”+