2 Rongorongo

7 Ngke e tia ngkekei Toromon n tataro,+ ao e a bwaka naba te ai mai karawa+ ao e kabueka te karea ni kabuekaki ma taiani karea, ao e a onrake te auti ni mimitongin Iehova.+ 2 Ao a aikoa kona ibonga* n rin n ana auti Iehova, ibukina bwa e a onrake ana auti Iehova ni mimitongin Iehova.+ 3 Ao a bane ni mataku tibun Iteraera ngke e bwaka te ai ao e mena mimitongin Iehova i aon te auti, ao a katorobubua ni bobaraaki nako aontano, ao a baraaki i aontano ni katituaraoa Iehova, “bwa e raoiroi, bwa e teimatoa n aki toki ana tangira ae koaua.”*

4 Ao te uea ma aomata ni kabane a anga taiani karea i matan Iehova.+ 5 E anga te karea te Uea ae Toromon ae kaao aika 22,000 ao tiibu aika 120,000. Ao te uea ma aomata ni kabane a katabua ana auti te Atua ae koaua.+ 6 A tei ibonga n aia tabo ake a beku iai, ao ai aroia naba tibun Rewi ake iai irouia bwaai ni katangitang ake a raona te anene nakon Iehova.+ (E karaoi baikai te Uea are Tawita ibukini katituaraoan Iehova, “bwa e teimatoa n aki toki ana tangira ae koaua,”* ngkana e anga ana nebonebo Tawita ma naakai.*) Ao a katangimwaakai taiani buu ibonga+ i mataia naakai, ngke a bane n tei tibun Iteraera.

7 Ao e katabua nukan te katawanang Toromon are i moan ana auti Iehova, ibukina bwa e a riai n anga ikanne taiani karea ni kabuekaki,+ ao mwakorokoroni mwaeten taiani karea n raoi,* bwa a aikoa ono taiani karea ni kabuekaki, te karea ae te amwarake,*+ ao mwakorokoro ni mwaete,+ n te baonikarea are te buraati+ are e karaoia Toromon. 8 N te tai anne ao e a karaoa te toa Toromon i nanon itibong+ ngaia ma tibun Iteraera ni kabane, ae te botaki n aomata ae moan te bati kaaina mai Reboamata* ni karokoa Mwaruan Aikubita.+ 9 Ma a karaoa te botaki ae okoro n te kawanua ni bong,*+ ibukina bwa a a tia ni katabua te baonikarea i nanon itibong, ao te toa i nanon itibong. 10 Ao n te ka-23 ni bong n te kaitiua n namwakaina, ao e a kaokiianako aomata nakoni mwengaia, ma te kimwareirei+ ao namakinan te kukurei i nanoia, ibukin te raoiroi are e a tia ni kaotia Iehova nakon Tawita ao Toromon ao ana aomata aika tibun Iteraera.+

11 Mangaia are e katiaa Toromon ana auti Iehova ao ana auti* te uea.+ Ao bwaai ni kabane ake a rio i nanon Toromon bwa e na karaoi ni kaineti ma ana auti Iehova ao bon oin ana auti, e boni katiai raoi.+ 12 Ao e kaoti Iehova nakon Toromon+ n te bong ao e taku nakoina: “I ongo am tataro, ao I rinea te tabo aei ibukiu bwa te auti n angakarea.+ 13 Ngkana I kaina karawa ao ai akea te karau, ao ngkana I tua nakoia rokati bwa a na kana aon te aba, ao ngkana I kanakoa te aoraki ae kamamate nako buakoia au aomata, 14 ma ngkana a kananorinanoia+ au aomata aika ingoanaki n arau,+ ao a tataro n ukoukorai ao n rairakinako man aroaroia aika bubuaka,+ ao N na ongo mai karawa ao N na kabwarai aia bure ao ni kamarurunga abaia.+ 15 Ao a na ure matau ao a na uki taningau nakon te tataro n te tabo aei.+ 16 Ao I a tia ngkai n rinea ao ni katabua te auti aei bwa e aonga ni mena iai arau n aki toki,+ ao a na mena matau ma nanou iai n taai nako.+

17 “Ao ngkoe ngkana ko nakonako i matau n aron tamam are Tawita n nakonako, n arom ni karaoi bwaai ni kabane aika I tua nakoim, ao n ongeaba n au tua ma au moti,+ 18 ao N na kateimatoa kaintokanuean nakoam n uea,+ n aron are I karaoa te berita ma tamam are Tawita+ ni kangai, ‘E na bon teimatoa n iai temanna mani kanoam ae e na tautaeka i Iteraera.’+ 19 Ma ngkana kam rairakinako ma ni kitan au moti ma au tua ake I kaaki i matami, ao kam nako n toro irouia atua riki tabeman ma ni bobaraaki nakoia,+ 20 ao N na taeki wakaaia tibun Iteraera mai abau are I angania,+ ao N na tewenakoa mai matau te auti ae I katabua aei ibukin arau, ao N na karaoia bwa te bwai ni kakanikoaki,* ao te bwai ni bwainingareaki i buakoia botannaomata ni kabane.+ 21 Ao e na riki te auti aei bwa te auti ae urubekebeke. Ao a na tarataraia ma te miroaroa akana rirarikina+ ao a na kangai, ‘Bukin tera ngkai e karaoa aei Iehova nakon te aba aei ma te auti aei?’+ 22 Ao ane a na kangai, ‘Ibukina bwa a kitana Iehova+ ae Atuaia aia bakatibu, are e kairiia ni kaotinakoia man te aba are Aikubita,+ ao a nimtiia atua riki tabeman ao ni bobaraaki nakoia ma n toro irouia.+ Anne bukina ae e karokoa iai te rekenikai aei ni kabane i aoia.’”+