2 Tamuera
21 Ao e roko te rongo+ n ana bong Tawita i nanon tenua te ririki. Ao Tawita e titirakina Iehova, ao e taku Iehova: “E mena te katuturaraa i aon Tauro ao i aoia kaaini batana, ibukina ngke e kamateia I-Kibeon.”+ 2 Mangaia are e weteiia I-Kibeon+ te uea ao e taetae nakoia. (Bon tiaki tibun Iteraera I-Kibeon, ma bon nikiraia taian Amoraite.+ Ao a taetae n tuea ngkoa tibun Iteraera bwa a na aki kamateia,+ ma e ukoukora kamateaia Tauro ibukin ana tauaninne ae aki riai ibukia tibun Iteraera ao tibun Iuta.) 3 E taku Tawita nakoia I-Kibeon: “Tera ae I riai ni karaoia ibukimi, ao N na kangaa ni karaoa karekeani kabwaraan te bure bwa kam aonga ni kakabwaiaa ana natannaomata Iehova?” 4 A taku I-Kibeon nakoina: “Ara kangaanga aei ae irekereke ma Tauro ao kaaini batana, bon akea irekerekena ma te tirewa ke te koora,+ ao ti aki naba kona ni kamatea te aomata temanna i Iteraera.” Ngaia are e taku: “Ane kam taekinna ao I a karaoia naba ibukimi.” 5 A taku nakon te uea: “E kamaunaira ao e bairea kamaunaara te mwaane anne bwa ti na aki maeka n te tabo teuana n aonon Iteraera,+ 6 mangaia ae ko na anganira kanoana aika mwaane aika itiman. Ti na tauri rabwataia,*+ i matan Iehova i Kibea+ are ana kaawa Tauro, are e rineaki bwa te uea iroun Iehova.”+ E taku ngkanne te uea: “N na anga ngaiia nakoimi.”
7 Ma e kaotiota te atataiaomata te uea nakoni Mebiboteta+ are natin Ionatan, are natin Tauro, ibukin te taetae n tuea are karaoaki i matan Iehova, i marenan Tawita ma Ionatan+ are natin Tauro. 8 Mangaia are e kairiia mwaane aika uoman te uea, aika natin Ritiba+ are natin Aia, ake natin neiei ma Tauro, ake Aremoni ma Mebiboteta, ao mwaane aika niman aika natini Mikara*+ are natin Tauro, ake natin neiei ma Ateriera+ are natini Baretirai are te I-Meorata. 9 Ao e anga ngaiia nakoia I-Kibeon, ao a tauri rabwataia i aon te maunga i matan Iehova.+ A bane ni mate ngaiia ni kaitiman. A kamateaki ni moani bongin nako te tai n tai ike e a moanaki iai taiakin te baare. 10 Ao Ritiba+ are natin Aia, e anaa te raerobwa* ao e taakinna i aon te bwaa, mani moanakin te tai n tai ni karokoa bwakan te karau mai karawa i aon rabwataia naakai. E aki kariaia mannikiba ake i annang bwa a na tikubara i aoia n te ngaina, ke manin te tawaana aika tiritiri bwa a na roko i rarikia n te bong.
11 E a kaongoaki Tawita te baere e karaoia Ritiba are natin Aia, are buun Tauro ni kewe.* 12 Mangaia are e nako Tawita n anai riin Tauro ma riin natina are Ionatan mairouia mataniwin* Iabetikireata,+ ake a iraei mani maraen Betatian, ike a tauraki iai irouia I-Biritia n te bong are a orea iai Tauro i Kireboa.+ 13 E uotii mai ikekei riin Tauro ao riin natina are Ionatan, ao a ikotii naba riia mwaane ake a kamateaki.+ 14 Ao a tauni riin Tauro ma Ionatan are natina i Tieira+ are i abani Beniamin n ruanimateni Kiti+ are tamana. Ngke a a tia ni karaoi bwaai ni kabane ake e tua te uea, ao te Atua e a mutiakin aia bubutii ibukin te aba.+
15 Ao e a manga boo riki te buaka i marenaia I-Biritia ao tibun Iteraera.+ Ngaia are e a ruo Tawita ma ana toro ao a nako ni buakania I-Biritia, ma e a rangi ni kua Tawita. 16 Ao Itibibenoba ae kanoan temanna mai buakoia taian Rebaim,+ e kani kamatea Tawita. Rawawatan ana kainiwai teuaei ae te buraati bon 300 te tiekera*+ ao iai ana kabaang ae boou. 17 E aki tabwara Abitiai+ are natin Teruia ma e a roko naba ni buokia+ ao e orea te I-Biritia arei ao ni kamatea. N te tai anne ao a taetae n tuea ana rorobuaka Tawita nakoina ni kangai: “Ko na aki manga oki n otinako ma ngaira nakon te buaka!+ Bwa tiaki nanona bwa e na mate aia taura tibun Iteraera!”+
18 Imwin aei, ao e a manga boo riki te buaka ma I-Biritia+ i Koba. N te tai anne ao Tibekai+ are tibun Utiaa e kamatea Taba, ae kanoan temanna ae riki mairouia taian Rebaim.+
19 Ao e a manga boo riki te buaka ma I-Biritia+ i Koba, ao Ereanan are natin Iaareorekim are te I-Betereem, e kamatea Koria are te I-Kate are kain ana kainiwai kaanga ai aron aia kai taan rarangaa te kunnikai.+
20 E a manga boo riki te buaka i Kate, ao iai te mwaane temanna iai ae rangi n abwabwaki, ao iai tabonibaina aika 6 ni baina ni kauaai ao taboniwaena aika 6 ni waena ni kauaai, ao 24 botaia ni kabane. Ao boni ngaia naba kanoan temanna ae riki mairouia taian Rebaim.+ 21 E teimatoa ni kakanikoia tibun Iteraera,+ mangaia are e a kamateaki iroun Ionatan are natin Timei+ are tarin Tawita.
22 Aomata aika aman aikai boni kanoaia taian Rebaim i Kate, ao a bwaka ni bain Tawita ao ni baia ana toro.+