Kyakasatu, Julaayi 16
[Yahwe] amanyire nk’oku abantu ab’amagezi ebibatekereza tibirumu karungi koona.—1 Kol. 3:20, NWT.
Tusemeriire kwetantara kuhondera entekereza z’abantu. Kakuba tuhondera entekereza z’abantu, nitusobora kuleka kuhondera endengo za Yahwe. (1 Kol. 3:19) “Amagezi agobusinge bunu” gatwekambisa kukurakuraniza okwegomba okw’omubiri. Bamu h’Abakristaayo ab’omu rubuga rwa Peregamo na Suatira bakatunga entekereza y’abantu abaali babetoroire, abaaramyaga ebisisani kandi abasiihani. Yesu akaha obuhabuzi Abakristaayo ab’omu bitebe binu bibiri habwokuba bakasagika engeso ezo ez’obusiihani. (Kus. 2:14, 20) Kasumi kanu, abantu balengaho kutusindikiriza kusagika entekereza zaabo. Abanyabuzaale rundi abanywani nibasobora kukozesa enyikara eiturumu kutusindikiriza kucwa endengo za Yahwe. Ekyokurorraho, nibasobora kugamba ngu tikiri kibi kukora ebiturukugonza n’obukirukuba nikicwa endengo za Ruhanga kandi ngu Baibuli ekahwa ha mulembe. Obwire obumu nitusobora kutekereza ngu oburagirizi obututunga kuruga hali Yahwe tiburukwetegerezebwa kurungi. Nitusobora n’okwohebwa ‘kuhinguraho ebyahandiikirwe.’—1 Kol. 4:6. w23.07 16 ¶10-11
Kyakana, Julaayi 17
Engagani negonza obusumi bwona, mugenziwe ayazairwe habwobujune.—Nfu. 17:17.
Malyamu nyina Yesu, akaba nayetaaga amaani. Akaba atali omu buswere baitu akaba naija kutwara enda. Akaba atakakuzaaga abaana abe habwe, baitu hati akaba nagenda kukuza omwana ayakufookere Masiya. Ekindi, akaba atakabyamaga n’omusaija wena. Malyamu aine kuba yayeralikiriire nk’oku yakusoboroliire Yusufu, omusaija ow’akaba amujumbiire! (Luk. 1:26-33) Kiki ekyakonyiire Malyamu? Akasaba abandi obukonyezi. Ekyokurorraho, akasaba malaika Gabiryeri kumugambira ebirukukiraho ha bujunanizibwa bunu. (Luk. 1:34) Hanyuma, akagenda Yuda omu nsi ey’ensozi kubungira Erisabesi omunyabuzaale we. Erisabesi akasiima Malyamu kandi Yahwe yamuleetera kubaza obunabbi oburukugarramu amaani oburukukwata ha mwana wa Malyamu ow’akaba akyali munda. (Luk. 1:39-45) Malyamu akagamba ngu Yahwe akaba “ayolekere amani nomukonogwe.” (Luk. 1:46-51) Yahwe akagarramu Malyamu amaani nakozesa malaika Gabiryeri na Erisabesi. w23.10 14-15 ¶10-12
Kyakataano, Julaayi 18
Yatufora obukama, banyakatagara hali Ruhanga Ise.—Kus. 1:6.
Abahondezi ba Kristo abake baseserweho omwoyo ogurukwera kandi baine enkoragana ey’embaganiza na Yahwe. Banu abarukuhika 144,000, nibaija kuheereza nka banyakatagara na Yesu omu iguru. (Kus. 14:1) Ekiikaro Ekirukwera eky’omu heema yokutangatanganiramu nikikikirra enyikara eibarumu bakyali omu nsi, hanyuma y’okuseswaho omwoyo ogurukwera bakakomwa nk’abaana ba Ruhanga. (Bar. 8:15-17) Ekiikaro Ekirukukira Okwera eky’omu heema yokutangatanganiramu nikikikirra omu iguru nambere Yahwe aikara. Kandi orutimbi orwabaganizaamuga Ekiikaro Ekirukwera n’Ekiikaro Ekirukukira Okwera, nirukikirra omubiri gwa Yesu ogwakumulemeseze kutaaha omu iguru kufooka Nyakatagara Omukuru arukukirayo omu yekaru ey’eby’omwoyo. Obuyahaireyo omubiri gwe nk’ekihongwa habw’abantu, akakinguraho omuhanda ogwakusobozeseze Abakristaayo boona abaseserweho amagita kutunga obwomeezi omu iguru. Nabo baine kulekaho omubiri gwabo kusobora kutunga empeera yabo omu iguru.—Baheb. 10:19, 20; 1 Kol. 15:50. w23.10 28 ¶13