10 Ao I-Kareria a kaekaa te uea ni kangai: “Akea te aomata temanna n te aonnaba* ae e kona ni karaoa ae e tua te uea, bwa akea te uea ae kakannato ke te kowana ae e a tia n titiraki te bwai ae ai aron aei mairoun te ibonga ae te tia tabunea ke te tia kaiwa ke te I-Kareria. 11 E kangaanga te bwai ae e titiraki iai te uea, ao bon akea temanna ae kona n tuanga te uea te baei ma tii atua, ake a aki maeka i buakoia aomata aika mamate.”*