7 Imwina riki ao a a bane n ongo mataniwi n te taanga ni buaka ake a mena n te tawaana ma aia rorobuaka, ae e a tia ueani Baburon ni mwiokoa Ketaria are natin Aikam i aon te aba, ao e mwiokoia i aoia mwaane ma aine ao ataei, ni moa mairouia aomata aika maiu ni kainnano ake n te aba, ake a aki kanakoaki nako Baburon.+ 8 Mangaia are a a roko irouni Ketaria i Mitiba.+ Naakai bon Itimaera+ are natin Netania, Ioaanan+ ma Ionatan ake natini Karea, Teraia are natin Tanumeta, mwaane ake natin Ebai are te I-Netoba, ao Ietania+ are natin te I-Maakata, ao raoia aia rorobuaka. 9 Ao e berita n te taetae n tuea Ketaria are natin Aikam are natin Tiaban nakoia naakai ma aia rorobuaka ni kangai: “Tai maaka te beku irouia I-Kareria. Kam na maeka n te aba ao kam na toro iroun ueani Baburon, ao a na nakoraoi bwaai ni kabane ibukimi.+