28 Bon 20 ana ririki Aati+ ngke e riki bwa te uea, ao e tautaeka i Ierutarem i nanon 16 te ririki. E aki karaoa ae eti i matan Iehova n aron are e karaoia Tawita are ana bakatibu.+ 2 Ma e nakonako ni kawaia uean Iteraera,+ ao e karaoi naba bouannanti aika biiti*+ aika taiani Baara. 3 Irarikin anne, e kabueki karea ni kabubui n ana Mwarua Natin Innom* ao e kabuekiia natina mwaane n te ai,+ ni kakairi n aia mwakuri aika riribaaki natannaomata+ ake e kakioianako Iehova mai mwaia tibun Iteraera. 4 E teimatoa naba n angakarea ao ni kabueki karea ni kabubui n taabo aika rietata,+ n taian tabuki, ao i aan nako kaai aika manguroro.+