27 Ngke e roko naba ngkekei Tawita i Maanaim, ao Tiobi are natin Naati mai Rabaa+ are aia kaawa tibun Ammon, ao Makira+ are natin Ammiera mai Roteba, ao Baretirai+ are te I-Kireata mai Rokerim, 28 a uotii nne ni wene, beetin, bwaata aika karaoaki man te bokaboka, te uita, te baare, te burawa, te uita ae umunaki, biin aika raababa, rentire, koraa aika umunaki, 29 aia karewe manibeeru,* te bwata, taian tiibu, ao te tiiti.* A uotii baikai ni kabane nakon Tawita bwa kanana ma aomata ake raona,+ bwa a taku: “A a baki aomata akekei ao a a kua ma ni bwatakataka n te rereua.”+