14 E karaoi ngkanne kunnikai mani buraen te kooti ibukin rabunan aon te umwanrianna ae tabu. E karaoi kunnikai aika 11.+ 15 Abwakini kunnikai aikai kaka 30 te mwanokunibai, ao kaka 4 te mwanokunibai raababaia. Titeboo abwakin ao raababani kunnikai aika 11 aikai. 16 Ao e tomai kunnikai ake nimaua, ao e a manga tomai kunnikai ake onoua riki. 17 Imwina ao e karaoi timoimoi aika 50 i taran te kabanea ni kunnikai ike a toma iai, ao e karaoi timoimoi aika 50 i taran te kunnikai are teuana are e toma ma ngaia. 18 Ao e karaoi kaai ni kareke aika taiani buraati aika 50 ibukin tomaan rabunan te umwanrianna ae tabu bwa e na riki bwa teuana.